Stytting námstíma stúdentsprófsbrauta: Áhrif á inntak bóklegs náms á framhaldsskólastigi og áframhaldandi nám á háskólastigi.
Árið 2014 ákváðu stjórnvöld að stytta allar stúdentsprófsbrautir íslenskra framhaldsskóla úr fjórum árum í þrjú. Eitt af aðal markmiðum þessarar ákvörðunar var að takast á við hátt hlutfall brotthvarfs úr framhaldsskólanámi. Styttingin fól í sér miklar breytingar á framhaldsskólanámi þó ekki sé mikið vitað um afleiðingar hennar hvað varðar inntak stúdentsprófsbrauta framhaldsskólanna. Stúdentspróf frá íslenskum framhaldsskóla veitir aðgöngu að háskólanámi og því má ætla að afdrifaríkar stefnubreytingar á stúdentsprófsbrautum framhaldsskóla hafi áhrif á nám á háskólastigi.
Markmið verkefnisins er að kanna áhrif styttingarinnar á inntak stúdentsprófsbrauta og afleiðingar hvað varðar flæði nemenda í gegnum menntakerfið í háskólanám. Það felur í sér að kanna hvernig inntak stúdentsprófsbrauta hefur breyst í kjölfar styttingarinnar almennt og hvernig hún var útfærð innan einstaka skóla út frá breytum eins og skólagerð, stærð og staðsetningu. Markmið verkefnisins felur einnig í sér að kanna hvort/hvernig styttingin hefur haft áhrif á áframhaldandi nám á háskólastigi með því að skoða flæði nemenda úr framhaldsskóla í Háskóla Íslands og loks að kanna hvernig háskólinn hefur aðlagast þessum breytingum á framhaldsskólastigi, m.a. með því að skoða breytingar á aðgöngukröfum í Háskólann. Niðurstöður verkefnisins munu hafa hagnýtt gildi fyrir áframhaldandi rannsóknir, þróun og umbætur á framhalds- og háskólanámi og flæði nemenda á milli skólastiganna tveggja.
Niðurstöður benda til þess að dreifstýrt námskrárumhverfi, ólík stofnanageta og stytting námstíma stúdentsprófsbrauta hafi leitt til ólíkra tækifæri nemenda í námi og undirbúningi fyrir nám á háskólastigi. Þessi breytileiki birtist í ólíkri uppbyggingu námsbrauta, mismunandi framboði náms og ójöfnu aðgengi að framhaldsáföngum.
Niðurstöðurnar undirstrika mikilvægi þess að styrkja skóla í að tryggja nemendum aðgang að námi með skýrri fræðilegri dýpt og að áfangar séu í boði með reglubundnu millibili; þetta kallar á endurskoðun reiknireglna og markvissari fjárhagslegan stuðning sem gerir skólum kleift að viðhalda samfelldum og traustum námsleiðum fyrir alla nemendur.
Verkefnið hlaut doktorsnemastyrk Menntarannsóknasjóðs 2021.
Leiðbeinendur verkefnis eru Elsa Eiríksdóttir og Guðrún Ragnarsdóttir.
