Um SKORA verkefnið
Knattspyrna er margþætt íþróttagrein þar sem leikmenn þurfa m.a. að búa yfir líkamlegum, andlegum, tæknilegum sem og taktískum eiginleikum. Síðustu áratugi hefur konum fjölgað gríðarlega í heimi íþróttanna en þessi aukning hefur hvatt til frekari rannsókna um frammistöðu og færni kvenna í íþróttum. Á sama tíma er mikill uppgangur og velgengni í íslenskri kvennaknattspyrnu og hefur þátttakendum á öllum aldri fjölgað jafnt og þétt.
Frá 8. apríl – 15. júní 2024 safnaði hópur vísindafólks frá Háskóla Íslands í samvinnu við vísindamenn frá Noregi og Svíþjóð gögnum og fóru með rannsókn á atgervi, andlegri og félagslegri heilsu knattspyrnustúlkna fæddar árið 2012 sem eru í 5. flokki (eldra ári). Þátttakendur voru frá 10 knattspyrnufélögum, öll á höfuðborgarsvæðinu og voru um 220 knattspyrnu stúlkum boðin þátttaka. Þessum stúlknahóp verður fylgt eftir í 4 ár og boðaðar aftur í rannsóknina vorið 2026 og að lokum vorið 2028.
Í rannsókninni voru framkvæmdar ýmsar mælingar á atgervi eins og þrek, snerpa, hraði, kraftur og færni. Sérstök áhersla var á að skoða líkamssamsetningu, kynþroska, beinþroska stúlkna og áhrif tíðahrings á tíðni meiðsla og brottfall stúlkna úr knattspyrnu. Þessir þættir verða einnig tengdir við andlega líðan (frammistöðukvíða, sjálfsímynd og fl.), líkamlega heilsu, þjálfun og aðra lífstílsþætti. Fjöldi æfinga, brottfall, tíðni íþróttameiðsla og almennir lifnaðarhættir verða einnig skoðað með spurningalista.
Verkefnastjóri mælinga: Vaka Rögnvaldsdóttir
Verkefnastjóri verkefnis: Rúna Sif Stefánsdóttir
_____________________
Niðurstöður eftir fyrstu fyrirlögn:
Tvær greinar komu út eftir fyrstu gagnasöfnun:
- Associations Between Bone Age, Body Composition and Physical Performance in Icelandic 12‐Year‐Old Female Soccer Players
- Höfundar: Rúna Stefánsdóttir, Hilde Gundersen, Sigurður Benediktsson, Mona Vestbøstad, Erlingur Jóhannsson og Vaka Rögnvaldsdóttir
- European Journal of Sport Science, 2025
- Asymmetries in lean mass, balance, and stability in 12-year-old female soccer (football) players: a cross-sectional study
- Rún Stefánsdóttir, Hekla D. Guðmundsdóttir, Erlingur Jóhannsson og Vaka Rögnvaldsdóttir
- Frontiers in Sports and Active Living, 2025
Fjórir meistaranemar skrifuðu upp úr gögnum rannsóknarinnar.
- Fjölnir Bjarnason, M.Sc. ritgerð: Afkastamælingar á íslenskum knattspyrnustúlkum: Hversu vel spáir spretthraði, loftháð geta, lóðrétt stökk og knattrak fyrir um getustig 12 ára stúlkna á knattspyrnuvellinum?
- Bjarki Reyr Tryggvason, M.Sc. ritgerð: Hefur líkamssamsetning ungra kvenna í knattspyrnu áhrif á frammistöðu í knattraki og sprett- og þolprófum?
- Lárus Sigurðsson, M.Ed. ritgerð: Andleg líðan 12 ára knattspyrnustúlkna á Íslandi.
- Adna Mesetovic, M.Sc. ritgerð: Svefnmunstur íslenskra 12 ára stúlkna og tengsl við getu í knattspyrnu.
