Kveikjan að þessari rannsókn er sú þróun sem hefur átt sér stað í starfsnámi á Íslandi á síðastliðnum árum, bæði er varðar fjölbreyttari nemendahóp og nýjungar í kennsluháttum. Samhliða aukinni aðsókn á sumar námsbrautir sækja nú hlutfallega fleiri yngri nemendur um skólapláss. Á vinsælum námsbrautum eru eldri nemendur líklegri en áður til að fá höfnun á skólavist vegna fjöldatakmarkana og forgangs þeirra sem koma beint úr grunnskóla.
Markmið rannsóknarinnar er tvíþætt. Í fyrri hluta rannsóknarinnar er markmiðið að lýsa því síbreytilega landslagi sem blasir við í starfsnámi á Íslandi er varðar breytilega aðsókn og samsetningu nemendahópsins. Þessi hluti rannsóknarinnar felst að mestu í úrvinnslu opinberra gagna og notkun lýsandi tölfræði til að varpa ljósi á þær áskoranir sem takast þarf á við í skipulagi starfsnáms.
Í seinni hluta rannsóknarinnar er markmiðið að lýsa kennsluháttum á einstökum námsbrautum og varpa ljósi á styrkleika og áskoranir sem fylgja kennsluháttunum, sérstaklega þegar kemur að því að mæta fjölbreyttum nemendahópi. Þrjár námsbrautir eru þar teknar til sérstakrar skoðunar. Kenningalegur grunnur þessa hluta byggir á kenningum Basil Bernstein og eru hugtök úr kenningum hans notuð til að lýsa gangvirki námsbrautanna og áhrifum kennsluháttanna á nemendur og kennara. Einnig er unnið með hugtakið „tilbúinleika“ (e. readiness) sem nær yfir þá þekkingu, leikni og viðhorf sem þurfa að vera til staðar hjá nemendum svo þeir séu reiðubúnir til að takast á við nýjar og oft krefjandi áskoranir í starfsnámi. Eigindlegar rannsóknaraðferðir, vettvangsathuganir og viðtöl, eru notaðar í þessum hluta. Niðurstöður rannsóknarinnar hafa kennslufræðilegt gildi ásamt því að veita mikilvæga innsýn í heim starfsnáms á Íslandi. Niðurstöðurnar geta nýst við stefnumótun og skipulagningu náms ásamt því að leggja grunn að frekari rannsóknum á sviðinu.
Verkefnið hlaut doktorsnemastyrk frá Rannís.
